హృదయంలో దీపశిఖలా ఉంటారు అమ్మవారు - చీమలపాటి సూర్యనారాయణ
🙏" శ్రీమాత్రేనమః "🙏
" మునిమానసహంసికా " - అమ్మవారి అద్భుతనామం. ఇది శ్రీలలితాసహస్రరహస్యనామాల్లో 816 వ నామం.
ఈనామం అర్ధం " మునుల మనస్సనే మానససరోవరమునందుండు ఆడుహంస " అని భాష్యం చెప్పారు.
అమ్మవారు అన్నారు " నాహం తీర్థే, న కైలాసే, వైకుంఠేవా న కర్హచిత్ " అని - అంటే తీర్థాల్లోనో, కైలాసంలోనో, వైకుంఠంలోనో ఉండను నేను " అని.
ఋషులు అడిగారు " వసామి కింతు?" - అంటే మరెక్కడ ఉంటావమ్మా అని.
" మత్ జ్ఞాని హృదయాంభోజమధ్యమే " - అంటే " జ్ఞానుల హృదయాలలో ఉంటాను " అని తెలియచేసారు అమ్మవారు.
జడులు/అజ్ఞానులు గుడిలోని లింగాన్ని ఎలా చూడగలుగుతారో జ్ఞానులు తమ హృదయంలో ఉన్న జ్యోతిర్లింగాన్ని అంతే స్పష్టంగా చూడగలుగుతారు.
" బ్రహ్మ సత్యం, జగన్మిధ్య " అన్నారు శంకరులు. అది తెలుసుకోవడమే జ్ఞానం.
మునుల మనస్సు మానససరోవరంలా స్వచ్ఛంగా ఉంటుంది. దానిలో అమ్మవారు హంసలా ఉంటారు. హంస తెల్లగా ఎంత స్వచ్ఛంగా ఉంటుందో అందరికీ తెలుసు.
శ్రీసూక్తంలో అమ్మవారిని ప్రార్ధిస్తూ " లోకైక దీపాంకురాం ( లోక+ఏక+దీప+అంకురాం ) అంటాం అంటే " లోకాలన్నింటికీ ఒకే ఒక్క దీపంగా ఉన్నది " అని. దీపం అంటే జ్ఞానం. లక్ష్మీదేవి జ్ఞానప్రదాత.
చీకటి పోవాలంటే దీపం కావాలి. అజ్ఞానాంధకారం పోవాలంటే దీపలక్ష్మి అనుగ్రహం కావాలి.
అమ్మవారు దీపశిఖలా ఉంటారు హృదయంలో. అజ్ఞానం/మాయ/మసి ఆవరించి ఉండడంవల్ల కనిపించదు. మాయ తొలగుతే అందా ఆనందమే.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment