అజ్ఞానం వదిలించుకునే ప్రయత్నం చేస్తూండాలి - చీమలపాటి సూర్యనారాయణ
🙏"శ్రీమాత్రేనమః"🙏
" తమో2పహా " - అమ్మవారి ఒక అత్యద్భుతనామం. ఇది శ్రీలలితాసహస్రరహస్యనామాలలో 361వ నామం.
" తమః + అపహా " అంటే అజ్ఞానంని పోగొట్టునది.
ఇంతకీ అజ్ఞానం అంటే ఏమిటి?.
తను ఎవరో అది తాను కాదనుకోవడం, తను ఏది కాదో అది తను అనుకోవడమే అజ్ఞానం. ఈ శరీరమే శాశ్వతం అనుకోవడం, దాని కోసమే జీవితాంతం పాటుపడడం. తనకోసమే కాకుండా తరువాత తరాలకు కూడా అశాశ్వతమైన సంపదలు కూడబెట్టడం. వాటికోసం చేయకూడని పనులన్నీ చేయడం.
చేయవలసిన పనులు చేయకపోవడం, చేయకూడని పనులు చేయడం. సమస్యలలో కూరుకుపోవడం. జీవితాన్ని దుఃఖదాయకం చేసుకోవడం.
" తస్మాదజ్ఞానసంభూతం
హృత్స్థం జ్ఞానసినాత్మన: |
ఛిత్త్వాయినం సందేహం
యోగమాతిష్ఠోత్తిష్ఠ భారత "
- భ.గీత 4:42
" కాబట్టి, జ్ఞాన ఖడ్గంతో హృదయంలో తలెత్తిన సందేహాలను ఛేదించు . ఓ భారతా కర్మయోగంలో స్థిరపడి, యుద్ధము చేయుటకు లే " అన్నారు పరమాత్మ అర్జునుడితో. ఏది చేయాలో అది చెయ్యి. సందేహించకు అన్నారు.
ఆశ్చర్యం ఏమిటంటే అప్పుడప్పుడు కొన్ని సత్యాలు అనుకోకుండా బయటకు వచ్చేస్తూంటాయి. కొందరు నాయకులు " ఆత్మప్రబోధానుసారం " ఓటు వెయ్యండి అంటూంటారు. అంటే మనిషి లోపల పవిత్రమైన ఆత్మ ఒకటి ఉందని అందరికీ తెలుసు. కాని దాని ఉన్నతి కోసం ఎవరూ ప్రయత్నించరు. అదే అజ్ఞానం.
త్యాగయ్య " పరహింస పరభామాన్యధన పరమానవాపవాద పరజీవనాదుల కనృతమే భాషించెదరయ్య త్యాగరాజనుత - ఎంతనేర్చిన ఎంతజూచిన ఎంతవారలైన కాంత దాసులె " అని కీర్తించారు.
ఈ విషయాలనుంచి బయటపడాలంటే అమ్మవారి మీద అచంచలమైన భక్తి ఒక్కటే మార్గం.
" శివానుగ్రహదేవా ముముక్షుర్వై శరణమహంప్రపద్యే " - " ఈశ్వరానుగ్రహం పొందాలంటే భక్తియే మార్గం " అని ఉపనిషత్తులు తెలియచేస్తున్నాయి.
భక్తి అజ్ఞానాన్ని పోగొడుతుంది. అజ్ఞానం పోతే అంతా సచ్చిదానందమే ( సత్ + చిత్ + ఆనందం ) కదా.
అందరం అమ్మవారి పాదాలను ఆశ్రయిద్దాం.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment