కృష్ణపరమాత్మ శుభలక్షణములు ఏమి? - చీమలపాటి సూర్యనారాయణ

 🙏"శ్రీరస్తు శుభమస్తు"🙏 

" సత్యం శౌచం దయా శాంతిః త్యాగస్సంతోషాద్యవం 

  శమోదమస్తపస్సౌమ్యం ఇతిక్షోపరతిశ్శృతం జ్ఞానం 

  విరక్తిరైశ్వర్యం శౌర్యం తేజో బలం స్మృతిః  

  స్వాతంత్ర్యం కౌశలం కాంతిః ధైర్యం     

  మార్దవమేవచ ప్రాగల్భ్యం ప్రశ్రయశ్శీలం  

  సహః ఓజో బలం భగః  గాంభీర్యం స్థైర్యమార్తిక్యం  

  కీర్తిర్మానోనహంకృతిః ఏతేచ అన్యే "

ఇవి కృష్ణపరమాత్మ శుభలక్షణములు. 

పరీక్షత్ మహారాజు జనరంజకంగా ధర్మపాలన చేస్తున్నారు. కలి ప్రభావం వలన అధర్మం పెరుగుతూంది. అన్యాయాన్ని, అధర్మాన్ని నిర్మూలించడం రాజు పని. అందుకని ఆయన సంచారం చేస్తూ అధర్మాన్ని నిగ్రహిస్తున్నారు. 

ఓ ప్రదేశంలో ఓ గోవు ఏడుస్తూంటే ఓ వృషభం కుంటుతూ వచ్చి ఓదారుస్తూంది. ఎంత అద్భుత సన్నివేశం. 

ఆ గోవు భూమి. ఆ వృషభం ధర్మం. 

ధర్మం అడుగుతూంది " కలి ప్రవేశిస్తూందనా, దుష్టులు పాలకులవుతున్నారనా, రాబోయే చెడుదినాలను తలచుకునా, ప్రకృతి అంతా నిస్సారమవుతుందనా లేక నిన్నటివరకూ తిరుగాడిన కృష్ణపరమాత్మ తన పాదాన్ని నీపైనుంచి తీసేసినందుకా, దేనికని బాధపడుతున్నావు తల్లీ " అని. 

ఇక్కడ అద్భుతమయిన విషయమేమిటంటే వృషభం ( ధర్మం ) తన " తపస్సు, శౌచం, దయ " అనే 3 కాళ్ళు చచ్చు పడిపోగా " సత్యం " అనే 4 వ కాలుతో కుంటుతూ నడుస్తూంది - కలి ప్రభావం.

అప్పుడు గోవు అంటుంది " నువ్వు చెప్పిన ఈ అవలక్షణాలన్నీ పరమాత్మ పాదం తీసేయడం వలననే కదా. ఆయన లీలలు అన్నీ నేను ( భూమిగా, గోవుగా ) స్వయంగా చూసి తరించాను " అని చెబుతూ ఆయన శుభలక్షణములను పైవిధంగా తెలియచేస్తుంది.

ఇక్కడ 39 లక్షణములను చెబుతూ చివరలో " ఏతేచ అన్యే " అంది గోవు - అంటే " ఇంకా చాలా ఉన్నాయి " అని. 

వీటిలో చాలా పదాలకు ( 1,3,4,5,6,10,16, 18,19,20,22,23,24,25,29,32,34,35,37,38 ) అర్ధాలు తెలిసినా కొన్ని అద్భుతమైన క్రొత్తపదాలు ఉన్నాయి. వాటి అర్ధాలు తెలుసుకుందాం:

2.  శౌచం - బహిర్శుద్ధి,  అంతర్శుద్ధి - రెండూ 

     ముఖ్యమే. మనతో బాటు  సమాజం కూడా   

 ‌‌    ఆరోగ్యంగా ఉంటేనే జీవితం 

     ఆనందదాయకంగా  ఉంటుంది.

7.  ఆద్యవం - నిష్కపటం,  ఋజుస్వభావం. 

     మనసా వాచా కర్మణా   ఒకటే చేయడం.

8.  శమం - అంతరేంద్రియ  నిగ్రహం 

9.  దమం - బహిరేంద్రియ నిగ్రహం 

11.సామ్యం - సమబుద్ధి 

12.ఇతిక్ష - కష్టసహిష్ణుత, క్షమ

13.ఉపరతిః - వ్యవహారిక  విషయాలనుంచి 

      తనను తాను మరల్చుకోవడం 

14.శృతం - బహుశాస్త్ర  ( పుస్తక) జ్ఞానం 

15.జ్ఞానం - బ్రహ్మజ్ఞానం 

17.ఐశ్వర్యం - ఈశ్వరభావం

21.స్మృతిః - స్మరణ,  తానేమిటో మరచి    

     పోకుండా ఉండడం

26.మార్దవం - మృదుత్వం

27.ప్రాగల్భ్యం - మిక్కిలి  ప్రతిభ 

28.ప్రశ్రయః - వినయం 

30.సహః - సాహసం,  సహనం, తట్టుకోగలగడం

31.ఓజః - ఉత్సాహం,  సమస్త భువనాలను 

     భరించగలిగే బలం

33.భగః - సౌభాగ్యం 

35.ఆర్తిక్యం -  శాస్త్రవాక్యములందు 

     అచంచలమైన శ్రద్ధ 

39.అనహంకృతిః -  అహంకారం లేకపోవడం

అటువంటి అద్భుతమైన శుభలక్షణములు కలిగిన పరమాత్మ నడయాడిన నేల మనది. దాని పవిత్రతను కాపాడుకునే బాధ్యత మనదే.

ఏతత్ సర్వం శ్రీశ్రీకృష్ణార్పణమస్తు - సూర్య.

శుభం భూయాత్