భక్తులకు సంపదలు తృణప్రాయం - చీమలపాటి సూర్యనారాయణ

 🙏"శ్రీరస్తు శుభమస్తు"🙏

" యం లబ్ధ్వా చాపరంలాభం  

  మన్యతే నాధికం తతః,

  యస్మిన్ స్థితో న దుఃఖేన        

  గురుణాపి విచాల్యతే  " 

               - భ.గీత 6:22

 " పరమాత్మప్రాప్తిరూప లాభమును పొందినవాడు ( అనగా భగవత్సాక్షాత్కారమును పొందినవాడు) మఱేయితర లాభమునుగూడ దానికంటె అధికమైన దానినిగా తలంపడు.   బ్రహ్మానందానుభవస్థితిలోనున్న యోగిని ఎట్టి బలవద్దుఃఖములును చలింపజేయజాలవు " అన్నారు పరమాత్మ.   

భక్త రామదాసు ప్రజలు కట్టిన పన్నులను ప్రభుత్వానికి కట్టకుండా ఆ డబ్బుతో రాములవారికి గుడి కట్టించాడు, నగలు చేయించాడు. జైలులో పెట్టించినా, శిక్షించినా తొందరగా వచ్చి రక్షించమని రాముడినే వేడుకున్నాడు కాని రాజును వేడుకోలేదు. 

పోతనామాత్యుడిని భాగవతాన్ని ఎవరికయినా ఓ రాజుకి అంకితమిస్తే కావలసినంత ధనం ఇచ్చి సత్కరిస్తారని ఎందరో నచ్చచెప్పాలని చూసారు. పోతన ససేమిరా అన్నారు. రాములవారికి అంకితమిచ్చారు, నా బాగోగులు ఆయనే చూసుకుంటారు అని నమ్మారు.

త్యాగయ్యని అన్నగారు కూడా " ఈ పాటలు కూడు పెట్టవు, ఏ రాజుని పొగుడుతూ పాడినా కోరినంత ధనం ఇస్తారు " అని నచ్చచెప్పడానికి ప్రయత్నంచేసాడు. అంతకన్నా పది ఇళ్ళలో బిక్షం ఎత్తుకోవడం నయం అన్నారు త్యాగయ్య, అలాగే చేసారు కూడా.

అన్నమయ్యని బంధువులు, స్నేహితులు " ఎన్నాళ్ళు ఇలా వెంకటేశ్వరుడి మీద కీర్తనలు చేస్తావు. ఓ రాజుని పట్టుకుని నాలుగు కీర్తనలు చేస్తే చాలు రాజు మణులు, మాణిక్యాలు ఇస్తారు " అని సలహా ఇచ్చినప్పుడు ఆయన చేసిన కీర్తన ఇది:

" పుట్టుభోగులము మేము 

  భువి హరిదాసులము,

  నట్టనడిమి దొరలు 

  నాకియ్యవలెనా " 

" పుట్టుకతోటే హరిదాసులం, హరి అనంతసంపదకు వారసులం మేము. మాకు నడమంత్రపు సిరిగాళ్ళు ఇచ్చేదేముంది " అని.

వీరెవరూ కూడా కష్టాలకు వెరవలేదు. పరమాత్మ అనుగ్రహానికి మించిన సంపద లేదని నమ్మినవారు వీరు. అదే బ్రహ్మానందస్థితి. ఆ స్థితిలో బాహ్యసుఖాలు, సంపదలు తృణప్రాయం సాధకులకు.

ఏతత్ సర్వం శ్రీకార్తీకదయాదామోదరార్పణమస్తు - సూర్య.

శుభం భూయాత్