అమ్మవారు అంత సులభంగా దొరకరు - చీమలపాటి సూర్యనారాయణ
🙏"శ్రీమాత్రేనమః"🙏
" దురాధర్షా " అమ్మవారి అద్భుత నామం. ఇది శ్రీలలితాసహస్రరహస్యనామాలలో 772వ నామం.
" దురాధర్షా " అంటే కష్టమయిన తపముచే స్వాధీనము చేసుకొనుట గలది - అమ్మవారిని స్వాధీనం చేసుకొనుట అంత సులభము కాదు - అని అర్థం.
అమ్మవారిని ఎలా చూడగలమో బ్రహ్మాండపురాణం తెలియచేసింది:
" ధ్యానైక దృశ్యా జ్ఞానాంగీ
విద్యాక్షా హృదయా స్పదా
ఆత్మైక్యాత్ వ్యక్తమాయాతి
చిరానుష్టాన గౌరవాత్ "
అమ్మవారు జీవుడి హృదయంలోనే ఉంది. అనుష్టానం అంటే ఎడతెగని సాధనతో అమ్మవారిని చేరగలం అని తెలియచేస్తూంది పురాణం. ఎంత కఠిన సాధన చేయాలో తెలుస్తూంది.
మూకశంకరులు కామాక్షీ అమ్మవారిని ఇలా స్తుతిస్తారు:
" చింతితఫలపరిపోషణ
చింతామణిరేవ
కాంచినిలయా మే
చిరతరసుచరితసులభా
చిత్తం శిశిరయతు
చిత్సుధాధారా "
- మూకపంచశతి -3
ఇందులో " చిరతరసుచరితసులభా " అన్నారు. అంటే ఎంతోకాలము చేసిన సత్కర్మాచరణములచే సులభముగా లభించునది అని అర్ధము. ఎంతో కాలము అంటే ఎన్నో జన్మలు కూడా పట్టవచ్చు. సాధన చేయగా చేయగా చివరి జన్మలో " పరమాచార్య " వంటి జన్మ లభిస్తుంది, ఆ తరువాత జన్మ ఉండదు.
సాధన కష్టం అనుకుని దూరం పెట్టకూడదు. మొదలు పెడితే కొన్ని జన్మల తరువాత అయినా ముక్తి లభిస్తుంది. లేకపోతే ఈ జననమరణచక్రంలో అలా పుడుతూ చస్తూ బాధపడుతూ ఉండవలసిందే.
సాధనకోసం అవసరమయిన సంకల్ప బలాన్ని ప్రసాదించమని అమ్మవారిని వేడుకుందాం.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment