" ప్రపంచ ఆహార భద్రతా దినోత్సవం ". శుభాకాంక్షలు - చీమలపాటి సూర్యనారాయణ
🙏" శ్రీరస్తు శుభమస్తు "🙏
" అన్నం న నింద్యాత్
అన్నం నపరిచక్షీత "
- తైత్తిరీయ ఉపనిషత్తు
అన్నంని నిందించకూడదు అని తెలియచేస్తున్నాయి శాస్త్రాలు. జీవుడికి శక్తిని తేజస్సుని ఇస్తూన్నది బ్రహ్మం కదా. మరి మనం తినే తిండే కదా మనకు శక్తిని తేజస్సుని ఇస్తూన్నది. అందుకే ఉపనిషత్తులు " అన్నం పరబ్రహ్మ స్వరూపం " అని తెలియచేస్తున్నాయి.
విష్ణుసహస్రంలో స్వామిని " అన్నం అన్నాద ఏవ చ " అని ప్రార్ధిస్తాం. అంటే అన్నం ఆయనే, అన్నాన్ని ఇచ్చేదీ ఆయనే, ఆ అన్నాన్ని ( ఉదరంలోని జఠర అగ్ని ద్వారా ) గ్రహిస్తూన్నది ఆయనే.
అందుకే మన సనాతనధర్మం ఏ తినుబండారాన్నైనా పరమాత్మకి నివేదించి తినమన్నారు. అప్పుడు అది ప్రసాదం అవుతుంది, ప్రత్యేక రుచి వస్తుంది. ప్రసాదంలో మనం లోపాలు వెదకం. అలాగే చిన్నప్పటినుంచే పిల్లలకు అన్నం మీద భక్తిని గౌరవాన్ని అలవాటుచెయ్యాలి. దేనినైనా ఇష్టంగా తింటే వంటికి పడుతుంది లేకపోతే నిరుపయోగమవుతుంది.
మా రెండో అన్నయ్యతో సాధారణంగా భోజనం చేసేవారం కాదు పిల్లలం. ఇంట్లో రకరకాల సైజుల పేకబెత్తాలు ఉండేవి. వాటిని ఎక్కువగానే వాడేవారు మా అన్నయ్య. అతని నియమం ప్రకారం కాళ్ళు కడుగుకుని విస్తరిముందు కూర్చుంటే కాళ్ళు ఆరేలోపు భోజనం అయిపోవాలి. భోజనం చేస్తూ గట్టిగా మాట్లాడినా, నవ్వినా, కామెంట్స్ చేసినా పేకబెత్తం తొడమీద నాట్యం చేసేది, వాత ( పట్టు పొట్టిలాగు కదా ) స్ఫష్టంగా తేలేది. అందుకని చాలా జాగ్రత్తగా ఉండేవాళ్ళం. ఇప్పటికీ ఇంట్లో భోజనం 5/10 నిముషాలే. భోజనసమయంలో ఎక్కువ మాటలు ఉండవు.
శ్రీకృష్ణుడు రాయబారానికి వెళ్ళినప్పుడు దుర్యోధనుడు తనభవనానికి రమ్మని శ్రీకృష్ణుడిని ఆహ్వానించినా వెళ్ళకుండా విదురుడి ఇంట్లో బసచేస్తారు. ఆయన సెలవిచ్చినది ఎక్కడైనా భోజనం చేసేటప్పుడు వారి మనస్తత్వం, ఆ అన్నాన్ని వారు ఎలా సంపాదించారు అన్నది తెలుసుకుని చేయాలి అని. అందుకే పెద్దవారు అందరి ఇళ్ళలోనూ భోజనాలు చెయ్యరు.
వండేవారి మనస్సు కూడా ప్రశాంతంగా భక్తిభావంతో నిండి ఉండాలి. అప్పుడే వండినది ప్రసాదం అవుతుంది, ఆరోగ్యాన్నిస్తుంది.
ఈరోజు " ప్రపంచ ఆహార భద్రతా దినోత్సవం ". శుభాకాంక్షలు.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment