సంశయం కలిగినప్పుడు మంచి గురువును పట్టుకోవాలి - చీమలపాటి సూర్యనారాయణ
🙏"శ్రీమాత్రేనమః"🙏
" నిస్సంశయా " అమ్మవారి అద్భుత నామం. ఇది శ్రీలలితాసహస్రరహస్యనామాలలో 172 వ నామం .
" నిస్సంశయా " అంటే సంశయములు లేనిది. సంశయాలు ఎవరికి ఉంటాయి. తను చేసిన, చేస్తూన్న పని సరైనదేనా అనే అనుమానం ఉన్నవారికే. లేకపోతే తను చేయబోయే పని గురించి తెలియనప్పుడు. మరి అమ్మవారికి అటువంటి పరిస్థితి రావడానికి అవకాశమే లేదు కదా.
సంశయాత్ములయిన వారికి ఈ లోకమున గాని పరలోకమున గాని సుఖము లేదు అన్నారు పరమాత్మ:
" అజ్ఞశ్చాశ్రద్ధధానశ్చ
సంశయాత్మా వినశ్యతి ।
నాయం లోకోఽస్తి న పరో
న సుఖం సంశయాత్మనః "
- భ.గీత 4:40
" జ్ఞానము, విశ్వాసము రెండూ లేని వారు మరియు అనుమానం పడే స్వభావం కలవారు, పతనమైపోతారు. విశ్వాసములేక, సందేహించే వారికి ఈ లోకంలో ఇంకా పరలోకంలో కూడా సుఖం ఉండదు " అని.
పరమాత్మ గీతలో ఇలా అంటారు అర్జునుడికి ఓ సంశయం కలిగినప్పుడు:
" తద్విద్ధి ప్రణిపాతేన
పరిప్రశ్నేన సేవయా,
ఉపదేక్ష్యంతి తే జ్ఞానం
జ్ఞానినస్తత్త్వదర్శినః "
- భ.గీత 4:34
" నీకు సంశయం కలిగినప్పుడు మంచి గురువును పట్టుకుని సేవ చేసుకో. మంచి ప్రశ్నలు వేసి జ్ఞానం పెంచుకో " అని.
ఇక్కడ స్వామి చెప్పినది ఏ సంశయాన్ని అయినా గురువు తీరుస్తారు అని. అంటే గురువుకు ఏవిషయంలోనూ సంశయాలు ఉండవు. మరి అమ్మవారు గురువులకు గురువు, గురురూపిణి. ఆవిడకు సంశయాలు ఎందుకు ఉంటాయి, ఎలా ఉంటాయి. అందుకే అమ్మవారు నిస్సంశయ.
అమ్మవారి పాదాలను ఆశ్రయిస్తే మనకు కూడా ఏ సంశయాలూ ఉండవు, ఉన్నా తొలగిపోతుంటాయి.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment