మనకు మనమే మిత్రులం, శతృవులం - చీమలపాటి సూర్యనారాయణ
🙏"శ్రీరస్తు శుభమస్తు"🙏
" బంధురాత్మాత్మనస్తస్య
యేనాత్మైవాత్మనా జితః !
అనాత్మనస్తు శత్రుత్వే
వర్తేతాత్మైవ శత్రువత్ "
- భ.గీత 6:6
" మనస్సును, ఇంద్రియములను, శరీరమును జయించిన జీవుడు తనకు తానే మిత్రుడు. అట్లు జయింపనివాడు తనకు తానే శత్రువు " అన్నారు పరమాత్మ.
అనగా జితేంద్రియునకు మనస్సు, ఇంద్రియములు, శరీరము భగవత్ప్రాప్తిసిద్ధికై మిత్రునివలె సహకరిస్తాయి . జితేంద్రియుడు కానివానికి మనస్సు, ఇంద్రియములు,శరీరము శత్రువులవలె ప్రవర్తించి లక్ష్యసాధనకు అవరోధకములుగా నిలుస్తాయి.
ఎంత అద్భుత విషయం. మనస్సు ఇంద్రియములు అదుపులో ఉంచుకుంటే జీవితం ఆనందమయంగా సాగిపోతుందని, ఏ కష్టాలు దరిచేరవని ఎంత చక్కగా తెలియచేసారు పరమాత్మ.
వాల్మీకి రామాయణంలో ఓ అద్భుత ఘట్టం ఉంది.
" ఇంద్రియాణి పురాజిత్వా
జితం త్రిభువనం త్వయా
స్మరద్భిరివ తద్వైరం
ఇంద్రియైరేవ నిర్జితః "
రావణుడు మరణించగానే మండోదరి అంటుంది రావణుడిని ఉద్దేశించి " ఇంద్రియాలు నీ అధీనంలో ఉంచుకొన్నప్పుడు మూడు లోకాలు నీ అధీనంలో ఉన్నాయి. ఇంద్రియనిగ్రహం కోల్పోయి పరస్త్రీని అపహరించి ఆ ఇంద్రియాల చేతిలోనే మరణించావు " అని.
ఇక్కడ తెలియచేసినది " ఇంద్రియాలే మిత్రులు, శతృవులు " అని.
" నీకు నువ్వే మిత్రుడు, శతృవు " అని వేల సంవత్సరముల క్రితమే చెప్పిన సత్యం ఎప్పటికీ ఇంకొన్ని వేల సంవత్సరముల తరువాత అయినా అక్షరసత్యం.
అదీ మన వాజ్మయం విశిష్టత.
ఏతత్ సర్వం శ్రీశ్రీకృష్ణార్పణమస్తు - సూర్య.
శుభం భూయాత్
Comments
Post a Comment