శ్రీయాజ్ఞవల్క్యమహర్షి జయంతి నేడు. - సమాజసేవే ముఖ్యం - చీమలపాటి సూర్యనారాయణ

 🙏"శ్రీరస్తు శుభమస్తు"🙏

శ్రీయాజ్ఞవల్క్యమహర్షి జయంతి నేడు.

" శ్రీయాజ్ఞవల్క్యమహర్షి" పలు " ధర్మశాస్త్ర " విషయాలు చెప్పారు. అది " యాజ్ఞవల్క్యస్మృతి " గా ప్రసిద్ధిచెందింది.

వేదాలలో ఒకటి అయిన యజుర్వేదాన్ని తరువాత కాలంలో సులువుగా అధ్యయనం చేయడానికి రెండుభాగాలుగా చేసారు. వాటిలో శుక్లయజుర్వేదంని ప్రతిపాదించినది ఈ " యాజ్ఞవల్క్యమహర్షి ". అద్భుతమయిన " ఈశావాస్యోపనిషత్తు " ఈ శుక్లయజుర్వేదంలోనిదే.

బృహదారణ్యకోపనిషత్తులో యాజ్ఞవల్క్యమహర్షి తన భార్య మైత్రేయికి చెబుతారు కొన్ని అద్భుత విషయాలు. ఆయన ఎన్నో విషయాలు ఒక్కొక్కటీ చెప్పుకొస్తారు. ఉదా: పిల్లవాడు మనవాడయితేనే ప్రియం. ఆవులాంటి జంతువులు మనవయితేనే ప్రియం. ఇలాంటివి చాలా చెబుతారు మహర్షి. 

" ఆత్మనస్తు కామాయ సర్వం ప్రియం భవతు " - మనదనుకొన్న కోరికలు మాత్రమే అన్నీ ఇష్టమవుతాయి మనుషులకు " అని. 

కుక్క ఒకటే కాని మనదయితే ఆప్యాయంగా ప్రేమగా చూస్తాం. వేరే వాళ్ళదయితే " ఛీ ఛీ " అని కర్ర పట్టుకుని తరుముతాం. మనదీ అని ఒక బంధం, మనకు ఉపయోగపడుతుంది అనే కోరిక.

" బ్రహ్మ సత్యం " అని కదా. ఆ సత్యాన్ని తెలుసుకోవడం ఎలా అనే విషయమై ఋషులందరూ ఒకసారి సమావేశమయారు. సత్యాన్ని తెలుసుకోవడం కన్నా అసత్యాన్ని గుర్తిస్తూ " నేతి ( న+ఇతి ), నేతి " - ఇది కాదు, ఇది కాదు - అనుకుంటూ ఎదరకు సాగడమే ఉత్తమం అని తేల్చారు. 

ఈ " అసత్యాన్వేషణ ( నేతి - న+ఇతి )" పద్ధతిని ప్రతిపాదించినది యాజ్ఞవల్క్యమహర్షి‌. 

ఓ ఉదాహరణ చూద్దాం. అమ్మవారి ఒకనామం " పరమాణుః " - అంటే అణువుకన్నా పరము/భిన్నము అయినది. అణువు అంటే చిన్నది/సూక్ష్మమయినది. పరమాణువు అంటే అతిచిన్నది అని. మరి ఎంత చిన్నది అంటే ఋషులకు కూడా కష్టమే చెప్పడం. అందుకని నేతి ( న+ఇతి - ఇది కాదు ), నేతి అనుకుంటూ వెడితే అసలు విషయం తెలుస్తుంది. ఇది అసత్యం, ఇది అసత్యం అనుకుంటూ వెడితే సత్యం బయటపడవచ్చు. బియ్యంలో రాళ్ళు ఏరేసినట్లుగా.

మొదట పదార్ధమూలం ( ధాతువు ) చిన్నదనుకున్నారు. తరువాత ప్రోటాన్స్, ఎలక్ట్రాన్స్ అవీ చిన్నవనుకున్నారు. మొన్న హిగ్స్ బోసన్ ని కనిపెట్టి ఇదే చిన్నదని " గాడ్ పార్టికల్ " అని పేరుకూడా పెట్టేసారు. ఇది కాదేమో అనుకుని ప్రయత్నాలు ( అసత్యాన్వేషణ ) కొనసాగిస్తే రేపు ఇంకా చిన్నది కనిపెట్టే అవకాశం లేకపోలేదు. 

మన సనాతనధర్మం ఎంతగొప్పదో తెలుస్తుంది " యాజ్ఞవల్క్యస్మృతి " చదివితే.

ఒక శ్లోకం/స్మృతి గురించి తెలుసుకుందాం:

" శ్రాంతసంవాహనం, 

  రోగిపరిచర్య, సురార్చనం, 

  పాదశౌచం, యజోద్యిష్ట

  మార్జనం, గోప్రదానవ్రత్ ".

" శ్రాంతసంవాహనం " అంటే అలసిపోయినవారిని ఆదుకోవడం. 

" రోగిపరిచర్య " అంటే రోగులకు సేవచెయ్యడం. ఈ రెండు విషయాలతరువాతే " సురార్చనం " అంటే దేవతలకు పూజ, విద్వాంసులని గౌరవించడం చేయాలని చెప్పారు. 

ఇలా చేసినవారికి " గోదానఫలం " వస్తుందని మహర్షి తెలియచేసారు.

వేల సం.ల క్రితమే మన ఋషులకు ఎంతటి సామాజికస్పృహ. ఎంతటి అద్భుత విషయాలతో కూడినది మన సనాతనధర్మం. అందుకే అది నిత్యనూతనంగా ఉంది/ఉంటుంది. మధ్యలో వచ్చినవి మధ్యలోనే ముగుస్తాయి. 

" నాన్యపంథా అయనాయ విద్యతే ( పురుషసూక్తం )" - సనాతనధర్మం తప్ప వేరే దారిలేదు ప్రపంచశాంతికి. కిం సంశయం?.

అందరికీ శ్రీయాజ్ఞవల్క్యమహర్షి జయంతి శుభాకాంక్షలు.

ఏతత్ సర్వం శ్రీకార్తీకదయాదామోదరార్పణమస్తు - సూర్య. 

శుభం భూయాత్