భక్తులు తిట్టినా కొట్టినా ఆనందమే అమ్మవారికి - చీమలపాటి సూర్యనారాయణ
🙏"శ్రీమాత్రేనమః"🙏
" భక్తిమత్కల్పలతికా " అమ్మవారి అద్భుత నామం. ఇది శ్రీలలితాసహస్రరహస్యనామాలలో 353 వ నామం.
" భక్తిమత్కల్పలతికా " అంటే భక్తిగలవారికి కల్పలత వంటిది. కల్పలత అంటే కల్పవృక్షం. ఇవ్వలేనిది లేదు.
తనను నమ్ముకున్న భక్తులంటే ఎంత ప్రేమ, అభిమానమో తల్లికి. వారి హృదయాలలో కొలవైయుండి వారు ఆనందానుభూతులలో తేలియాడడానికి అన్నివిధాలా తోడ్పాటునందిస్తూనే ఉంటుంది అమ్మవారు.
పూజ్యులు గరికిపాటివారు ప్రవచనంచేస్తూ ఓ అద్భుతమయిన విషయం చెప్పారు ( వ్యాసభారతంలో ఉన్న విషయం ఇది ). ఆయనకు, విన్నవారికి కూడా కళ్ళు చెమ్మగిల్లాయి. పరమాత్మ రధం నడుపుతున్నారు కురుక్షేత్రంలో. అర్జునుడు రధంలో నుంచుని యుద్ధం చేస్తున్నాడు. ఒకరిని కొట్టడమో, నిరాయుధుడిని చేయడమో అయిన తరువాత రధాన్ని తిన్నగా పోనివ్వాలా, ఎడమకు తిప్పాలా, కుడికి పోనివ్వాలా ఎలా తెలుస్తుంది సారధికి. పరమాత్మ సారధి, కూర్చుని ఉన్నారు, ఎక్కువదూరం కనబడదు. అర్జునుడు నుంచుని ఉన్నాడు, దూరంగా చూడగలడు, ఎటువెడితే ఉపయోగమో తెలుసుకోగలడు. ఒక చేతిలో ధనుస్సు, రెండో చేతిలో బాణం. రణరంగంలో రణగొణధ్వనులు. ఇతను ఏమిచెప్పినా సారధికి వినబడనేవినబడదు. ఎటువేపు వెళ్ళాలో సారధికి చెప్పడానికి ఏమిచేస్తారో తెలుసా?. కుడివైపు తిప్పు అనడానికి కుడికాలిపాదంతో సారధి నడుము కుడివైపున తడతాడు. ఎడమవైపైతే ఎడమపాదంతో సారధి నడుము ఎడమవైపున తడతాడు. అలా అర్జునుడు తన పాదాలతో తట్టి సూచనలు ఇస్తూంటే పరమాత్మ తదనుగుణంగా సారధ్యం చేసారు. ఎంతటి కరుణ పరమాత్మకు. భక్తుడు కోసం అతని పాదస్పర్శకూడా అనుభవించాడు.
" భక్తిమత్ కల్పలతికా " అని కూడా ఇంకో భాష్యం చెప్పారు. అంటే భక్తి తక్కువ అయినప్పుడు అమ్మవారు కల్పలతలా ఆదుకుని భక్తి పెరగడానికి తోడ్పాటునిస్తారు అని.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment