శరీరం దృఢంగా ఉన్నప్పుడే చిత్తశుద్ధికోసం ప్రయత్నం చేయాలి - చీమలపాటి సూర్యనారాయణ
🙏"శ్రీరస్తు శుభమస్తు"🙏
" ఆశ్చర్యవద్వదతి తధైవ చాన్యః,
ఆశ్చర్యవచ్చైనమన్యః
శృణోతి శ్రుత్వాప్యేనం
వేద న చైవ కశ్చిత్ "
- భ.గీత 2:29
" ఎవరో ఒక మహాపురుషుడు మాత్రమే దీనిని ( ఈ ఆత్మను) ఆశ్చర్యకరమైన దానినిగా చూచును. మరియొక మహాత్ముడు దీని తత్వమును ఆశ్చర్యకరముగా వర్ణించును. వేఱొక పురుషుడు దీనిని ఆశ్చర్యకరమైనదానినిగా వినును. ఆ విన్నవారిలోకూడ కొందరు దీనినిగూర్చి ఏమియు ఎఱుగరు " అన్నారు పరమాత్మ.
ఎంత చక్కటి విషయం. తరచుగా మనం " ఆత్మాభిమానం, ఆత్మగౌరవం, ఆత్మ ప్రబోధనానుసారం నిర్ణయం తీసుకోవడం " లాంటి విషయాలు వింటూనే ఉంటాం. అంటే తను ఒక నిత్యము సత్యము అయిన ఆత్మ అని అందరికీ తెలుసు. కాని జన్మజన్మలుగా పెంచుకుంటూ వస్తూన్న ఈ " దేహాభిమానం " పోదు. పోగొట్టుకోవడానికి ప్రయత్నించం కూడా.
ఆత్మ గురించిన ఎన్నో విషయాలను వింటూంటాం, చదువుతూంటాం. కాని ఆ విషయాలన్నీ పనికిరానివిగా అనిపిస్తాయి. బుర్రకు పట్టవు.
ఈ అశాశ్వతమయిన దేహానికి ఎటువంటి దుస్తులు తొడుగుదామా, కేశాలను అందంగా ఎలా అలంకరించుకుందామా, పాదాలకు ఎటువంటి చెప్పులు వేసుకుందామా అనే ఆలోచనే తప్ప ఆత్మప్రక్షాళన కోసం ఏ గుడులు దర్శిద్దాం, ఏ జపం చేసుకుందాం, ఏ పూజలు చేసుకుందాం, ఏ సంప్రదాయాలు పాటిద్దాం అని మాత్రం ఆలోచన రాదు.
మనం దుస్తులు మార్చినంత సులభంగా ఈ ఆత్మ శరీరాన్ని మార్చేసుకుంటుంది. మరణం అంటే గుండె, మెదడు, ఊపిరితిత్తులు పనిచేయకపోవడం కాదు. ఈ ఆత్మ శరీరాన్ని విడిచిపెట్టడమే అని కఠోపనిషత్తు తెలియచేస్తూంది. చిత్తశుద్ధి, ఆత్మప్రక్షాళనకు ఈ శరీరం అవసరమే. కాని ఇక ఈ శరీరం వలన తన ఉన్నతికి ఉపయోగమేమీ లేదు అని అనుకున్న మరుక్షణం ఆత్మ ఈ శరీరాన్ని వదిలేస్తుంది. ఇంకో శరీరాన్ని తీసుకుంటుంది.
మనం ప్రేతం అనే మాటను వింటూంటాం. ఆత్మ ఒక శరీరాన్ని వదలిన తరువాత ఇంకో శరీరాన్ని తీసుకునే వరకూ గాలిలో తిరుగుతూ ఉంటుంది. ఆ స్థితిలోని ఆత్మను ప్రేతం అంటారు. అది కూడా ఆత్మే. భయపడక్కరలేదు.
అందుకని శరీరం దృఢంగా ఉన్నప్పుడే చిత్తశుద్ధికోసం మంచికర్మలు చేస్తూ ఉండాలి. ఈ భౌతిక విషయాలన్నీ అశాశ్వతాలే అనే ఎరుకలో ఉంటే ముక్తి పొందడం అంత కష్టం కాదు.
ఏతత్ సర్వం శ్రీకార్తీకదయాదామోదరార్పణమస్తు - సూర్య.
శుభం భూయాత్
Comments
Post a Comment