అమ్మవారు చూస్తారు, చూడబడుతారు - చీమలపాటి సూర్యనారాయణ
🙏"శ్రీమాత్రేనమః"🙏
" జ్ఞానజ్ఞేయస్వరూపిణీ " అమ్మవారి అద్భుత నామం. ఇది శ్రీలలితాసహస్రరహస్యనామాలలో 981 వ నామం.
" జ్ఞానజ్ఞేయస్వరూపిణీ " అంటే చూచునది చూడదగినది రెండును స్వరూపముగా గలది. జ్ఞానం అంటే దృక్కు, చూపు ( చూచునది ). జ్ఞేయం అంటే దృశ్యం ( చూడదగినది ).
ఈశావాస్యోపనిషత్తు " ఈ చరాచర ప్రపంచం అంతా ఈశ్వరుడి చేత ఆచ్చాదింపబడిందని, అందుచేత 'నేను', 'నాది' అనే భావాలు పరిత్యజించి, త్యాగబుద్ధితో, లోభరహితంగా, లభించిన దానితో సంతృప్తి చెంది అనుభవించడమే ఉత్తమ నైతిక జీవనము " అని తెలియచేస్తూంది.
మనకు ఏది కావలసినా అమ్మవారే ఇవ్వాలి. అందుకని అమ్మవారిని పూజిస్తాం, ప్రార్థిస్తాం. పూజింపదగినది/చూడదగినది అమ్మవారు. అమ్మవారు మనకు కావలసినవి ఇస్తారు, మనల్ని బాగుగా చూసుకుంటారు. చూచునది అమ్మవారు. రెండూ అమ్మవారే.
పరమాత్మ గీతలో ఇలా తెలియచేసారు:
" అనన్యాశ్చింతయంతో మాం
యేజనాః పర్యుపాసతే,
తేషాం నిత్యాభియుక్తానాం
యోగక్షేమం వహామ్యహం "
- భ.గీత 9:22
" ఇతర ( అక్కర్లేని ) విషయాలగురించి ఆలోచనచెయ్యడం మానేసి నన్నే ధ్యానం చెయ్యి, నీ యోగక్షేమాలన్నీ నేనే చూసుకుంటాను " అన్నారు పరమాత్మ. క్షేమం అంటే ఉన్నది కాపాడడం. యోగం అంటే లేనిది ఇవ్వడం. రెండూ అనుగ్రహిస్తారు నమ్మి సేవిస్తే.
మన దృష్టి కేవలం అమ్మవారి పాదాలమీదే ఉంటే అమ్మవారు తన దృష్టి మనమీద పెట్టి అన్నీ అనుగ్రహిస్తారు.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment