శ్రీరామనవమి శుభాకాంక్షలు అందరికీ - చీమలపాటి సూర్యనారాయణ
🙏"శ్రీరస్తు శుభమస్తు"🙏
" అందాల రాముడు
ఎందువలన దేముడు "
" యజ్ఞానాం జపయజ్ఞో2స్మి " అన్నారు పరమాత్మ భ.గీతలో ( 10:25 ).
ధర్మబద్ధమయిన కోరికలు తీరడంకోసం ఏదయినా మంత్రాన్ని జపం చేసుకోవచ్చు. కాని ముక్తినిచ్చే తారక మంత్రం ఒకటే. అది " రామ " నామం.
రామనామం ఎందుకు అంత పవిత్రమయినది/ఉత్కృష్టమయినది/శక్తివంతమయినది అయింది?.
రామ లో " ర+అ+మ " - 3 అక్షరాలు ఉన్నాయి. ర అగ్నిబీజం, అ సూర్యబీజం, మ చంద్రబీజం.
మనసా(మ) వాచా(ర) కర్మణా(అ) అంటారు - రామ నామంలో ఈ మూడూ ఉన్నాయి.
విష్ణుసహస్రంలో " రామః విరామః " అనే నామాలతో ప్రార్ధిస్తాం స్వామిని. ఆదిశంకరులు రామః కి " నిత్యానంద చైతన్యములో సదా రమించువాడు " అని భాష్యం చెప్పారు.
వేదం ఇలా చెబుతూంది:
" రకారో అగ్నిబీజంశ్చాత్,
అకారో సూర్యబీజకం,
మకారశ్చంద్రబీజంచ " అని.
కుండలినీయోగాలో కూడా చక్రాలను 3 మండలాలుగా విభజించారు. మూలాధారం నుంచి అనాహతచక్రం వరకూ అగ్నిమండలం అని, అక్కడనుంచి ఆజ్ఞాచక్రం వరకూ సూర్యమండలం అని, ఆపైనదానిని చంద్రమండలం అనీ తెలియచేసారు.
రామ అని జపిస్తే ఈ 3 మండలాలూ జాగృతి/చైతన్యం చెందుతాయి. మనస్సు అలలు లేని సముద్రంలా నిశ్చలంగా నిర్మలంగా ఉంటుంది. మంచి ఆలోచనలు తప్ప చెడు ఆలోచనలు దరిచేరవు. సుఖమయ జీవితానికి అంతకంటే కావలసినది ఏముంటుంది. అందుకే రామనామం అంత శక్తివంతమయింది.
వాక్కుని శరీరాన్ని మనస్సుని చైతన్యపరిచేది రామ నామం.
" రమంతే సర్వేజనాః గుణైతి ఇతి రామః " అంటే " సర్వజనులను ఆనందింపచేసే గుణాలున్నవాడు రాముడు " అని తెలియచేస్తున్నాయి పురాణాలు.
గరుత్మంతుడు శ్రీరాముడిని " రిపుణామతి వత్సలా " అంటే " శత్రువులమీద కూడా వాత్సల్యం చూపేవాడు " అని కొనియాడాడు.
అమ్మవారు పార్వతీదేవి శివుడుని అడుగుతుంది " నిత్యం విష్ణుసహస్రం పారాయణచేసే పండితులు ఎప్పుడయినా ఏకారణంచేతనయినా చదువలేకపోతే ఆ విష్ణుసహస్రనామ పారాయణ ఫలితాన్ని పొందడానికి ఏమి చెయ్యాలి " అని. రామనామాన్ని 3 సార్లు జపిస్తే విష్ణుసహస్రపారాయణ ఫలితం లభిస్తుందని శివుడు తెలియచేసారు. రామనామం అంత పవిత్రమయినది.
" ఆపదామపహర్తారం దాతారం సర్వసంపదాం " - ఆపదలను పోగొడుతాడు, సంపదలన్నీ ఇస్తాడు. ఇంకేమి కావాలి సుఖమయజీవితానికి. శ్రీరామరక్ష, సర్వజగద్రక్ష.
" అందాల రాముడు
అందువలన దేముడు "
ఈరోజు మన భారతజాతికంతటికి పరమపవిత్రమయిన శ్రీరామనవమి. శుభాకాంక్షలు అందరికీ.
ఏతత్ సర్వం శ్రీశ్రీరామచంద్రార్పణమస్తు - సూర్య.
శుభం భూయాత్
Comments
Post a Comment