సూర్యచంద్రులు అమ్మవారి చెవి కమ్మలు - చీమలపాటి సూర్యనారాయణ
🙏"శ్రీమాత్రేనమః"🙏
" తాటంకయుగళీభూత తపనోడుప మండలా " అమ్మవారి అద్భుత నామం. ఇది శ్రీలలితాసహస్రరహస్యనామాలలో 22 వ నామం.
" తాటంకయుగళీభూత తపనోడుప మండలా " అంటే చెవికమ్మలుగా జంటగా అయిన సూర్య చంద్ర మండలములు కలిగినది. తపనోడుప - తపన ( సూర్యుడు ) + ఉడుప ( నక్షత్రాలకు రాజు చంద్రుడు ).
సూర్యుడు చంద్రుడు చెవికమ్మలుగా కలిగి ఉన్నారుట అమ్మవారు. సూర్యుడు తూర్పు దిక్కున ఉంటే చంద్రుడు ఎక్కడ ఉంటారు. పశ్చిమ దిక్కున. చంద్రుడు తూర్పు దిక్కున ఉంటే సూర్యుడు పశ్చిమ దిక్కున ఉంటారు. అంటే అమ్మవారి ముఖం రెండు దిక్కుల మధ్య దూరమంత. ఇక అమ్మవారి మొత్తం రూపం ఎలా ఉంటుందో ఊహించుకోవచ్చు. విరాడ్రూపిణి.
ఇంకో అద్భుతమయిన విషయం ఉంది దీనిలో.
గరుడపురాణం " ఆదిత్య చంద్రౌ అనిలో అనలశ్చ యౌ భూమి ఆపః హృదయం యమశ్చ అహశ్చ రాత్రిశ్చ ఉభేచ సంధ్యే ధర్మశ్చ జానాధి నరశ్చ వృత్తిం " అని తెలియచేస్తూంది. వీరందరూ సాక్షులు, జీవుల కర్మలను గమనిస్తూ ఉంటారు. వీరిలో
సూర్యచంద్రులు ముఖ్యులు. వీరు ఇద్దరూ అమ్మవారి చెవుల దగ్గరే కమ్మలుగా ఉండడం వల్ల ప్రతీ జీవి చేసే కర్మల విషయాలను ఎప్పటికప్పుడు అమ్మవారి చెవులలో చెబుతున్నారుట. ఎంత అద్భుత ప్రక్రియ, ఏర్పాటు చేసుకున్నారు అమ్మవారు.
ఆదిశంకరులు సౌందర్యలహరి గానం చేస్తూ అమ్మవారిని ఇలా ప్రార్థిస్తారు:
" సుధామప్యాస్వాద్య ప్రతిభయ
జరామృత్యు హరిణీ విపద్యం తేవిశ్వే
విధి శత మఖము ఖాద్యా దివిషదః
కరాళం యత్ క్ష్వేళం కబళితవతః
కాలకలనా న శంభోస్తన్మూలం
తవ జనని తాటంకమహిమా " - 28
" భయం, వృద్ధాప్యం మరియు మరణం కలగకుండా శక్తివంతమైన అమృతాన్ని తిన్నప్పటికీ బ్రహ్మ మరియు ఇంద్రుడు వంటి దేవతలందరూ ఆపదలను పొందుతున్నారు.
కాని భయంకరమైన కాలకూటవిషాన్ని మ్రింగిన శివుడికి మాత్రం మరణభయం లేదు. తల్లీ అంది నీ చెవికమ్మల మహిమయే " అని.
కాలస్వరూపుడు, కర్మ సాక్షి అయిన సూర్యుడు, అమృతమయమైన అన్నంని ప్రసాదించే అమృతమూర్తి చంద్రుడు చెవికమ్మలుగా ఉన్నారు అమ్మవారికి. ఇక లోటేముంటుంది మంగళాలకు.
సువాసినీలు అందరూ కర్ణాభరణాలు ధరిస్తారు అందుకే. చెవికమ్మలు మంగళకరం.
ఈరోజు ఆదివారం, అమావాస్య. ధ్యానానికి పవిత్రమయిన రోజు.
అమ్మవారి పాదాలను ఆశ్రయించి అందరినీ చల్లగా చూడమని వేడుకుందాం.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment