దండలో దారం వలే అంతర్లీనంగా అమ్మవారు జీవులందరిలోనూ ఉంటారు - చీమలపాటి సూర్యనారాయణ

 🙏"శ్రీమాత్రేనమః"🙏

" చేతనారూపా " అమ్మవారి అద్భుత నామం. ఇది శ్రీలలితాసహస్రరహస్య నామాలలో 417 వ నామం.

" చేతనారూపా " అంటే చైతన్య స్వరూపురాలు. సమస్త జీవులయందు అమ్మవారి చైతన్యం ఉంటుంది.

దేవీభాగవతంలోని మొదటి శ్లోకంలో " ఏ శక్తి మాకు ధర్మబుద్దిని ప్రేరణచేయుచున్నదో అట్టి సర్వచైతన్యస్వరూపురాలు, జ్ఞానస్వరూపురాలు అగు అమ్మవారిని ధ్యానము చేయుచున్నాము " అని ప్రార్ధన చేస్తాము.

" ఈశావాస్య మిదగ్ం సర్వం

  యత్కించ జగత్యాం జగత్ "

ఈ సూక్తి ఈశావాశ్యోపనిషత్తులో మొదటి మంత్రంలో మొదటి పాదం.  ఈ దృశ్యమాన విశ్వం అంతా ఈశ్వరుడి చేత కప్పబడి ఉంది - అంటే భగవంతుడు విశ్వవ్యాపకుడని, విశ్వమంతా ఈశ్వరచైతన్యంతో నిండి ఉందని అర్థం. 

విష్ణుసహస్రంలో " విశ్వం, విష్ణుః " అని ప్రార్ధిస్తాం స్వామిని.

పరమాత్మ గీతలో ఈ విషయాన్ని ఇలా అద్భుతంగా తెలియచేసారు:

" మత్తః పరతరం నాన్యత్   

  కించిదస్తి ధనంజయ,

  మయి సర్వమిదం ప్రోతం 

  సూత్రే మణిగణా ఇవ "

‌ ‌              - భ.గీత 7:7

" ఓ ధనంజయా, నాకంటెను పరమకారణమైనది ఏదియును లేదు. ఈ జగత్తునందలి వస్తువులన్నియును సూత్రమున సూత్రమణులవలె నాయందే కూర్పబడి యున్నవి " అని.

మణిహారంలో మణులే కనబడుతాయి. వాటిని కలిపి ఉంచే దారం కనబడదు. పరమాత్మ చైతన్యం ఆ దారం వంటిది. మణులు జీవులు.‌ సృష్టి అంతా ఈశ్వర చైతన్యమే.

సృష్టిలోని జీవులన్నింటినీ మణిహారంలోని దారంవలె తన చైతన్యంతో నింపి/కలిపి నడిపిస్తున్నారు అమ్మవారు. జీవులన్నీ వేరు వేరు అయినా వాటిలోని చైతన్యం మాత్రం ఒకటే. చైతన్యం ఉంటే జీవం, తొలగుతే శవం.

అమ్మవారి పాదాలను ఆశ్రయించి అందరినీ చల్లగా చూడమని వేడుకుందాం.

ఏతత్ సర్వం శ్రీపరదేవతార్పణమస్తు - సూర్య.

శుభం భూయాత్