అమ్మవారు విశ్వమంతా వ్యాపించి ఉన్నారు - చీమలపాటి సూర్యనారాయణ
🙏"శ్రీమాత్రేనమః"🙏
" సర్వాంతర్యామినీ " అమ్మవారి అద్భుత నామం. ఇది శ్రీలలితాసహస్రరహస్య నామాలలో 819 వ నామం.
" సర్వాంతర్యామినీ " అంటే జీవులందరియందు ప్రవేశించు దేవి అని భాష్యం చెప్పారు. అమ్మవారి చైతన్యం సృష్టి అంతా వ్యాపించి ఉంటుంది. రాళ్ళు రప్పలలో కూడా చైతన్యం ఉంటుంది.
మన ఇంద్రియాలు కూడా జడమని ( పనిముట్లు మాత్రమే), వాటితో పనిచేయించే శక్తి బ్రహ్మమని, అదే బ్రహ్మం మనలో జీవాత్మగా ప్రవేశిస్తుందని, అందుచేత మనకేదో స్వతంత్రమైన శక్తి ఉందని అహంకరించ కూడదనే సందేశంతో కేనోపనిషత్తు ముగుస్తుంది.
ఈశావాస్యోపనిషత్తులో ఈశ్వరుడి విశ్వవ్యాపకత గురించి బాగుగా వివరించారు:
" ఈశావాస్య మిదగ్ం సర్వం
యత్కించ జగత్యాం జగత్ "
ఈ సూక్తి ఈ ఉపనిషత్తులో మొదటి మంత్రంలో మొదటి పాదం. ఈ కనబడుతూన్న విశ్వం అంతా ఈశ్వరుడి చేత కప్పబడి ఉంది - అంటే భగవంతుడు విశ్వవ్యాపకుడని అర్థం. ఈ విషయం వేదంలో కూడా అనేక చోట్ల ప్రస్తావించ బడింది.
ప్రసిద్ధమైన నారాయణ సూక్తంలో ఇలా తెలియచేసారు:
" యచ్చ కించిజ్జగత్సర్వమ్
దృశ్యతే శ్రూయతే2పివా
అంతర్బహిశ్చ తత్సర్వం
వ్యాప్య నారాయణః స్థితః "
ఈ ప్రపంచంలో కనిపించేది, వినిపించేది ఏది ఉందో, దాని లోపల, బయట కూడా ఉన్నవాడు నారాయణుడే (అంటే బ్రహ్మమే) అని. ఇలా అంతా బ్రహ్మ మయమే అని గ్రహించి మానవుడు ఆయన మీదే మనస్సు లగ్నం చెయ్యాలని సందేశం.
" వేష్టి వ్యాప్నోతి ఇతి విష్ణుః - వ్యాపించినవాడు విష్ణువు " - విష్ణుసహస్రనామాలలో విష్ణుః ఒక నామం. విశ్వమంతా వ్యాపించి ఉన్నవారు అని భాష్యం చెప్పారు.
" తేన త్యక్తేన భుంజీథా
మా గృధః కస్య స్విద్ధనమ్ "
ఈ చరాచర ప్రపంచమంతా భగవన్మయమే అయినప్పుడు ఈ వస్తువు నాది, నేను సంపాదించాను అనుకోవడం అజ్ఞానం. అన్ని సంపదలు, సుఖాలూ భగవద్దత్తమైనవనే భావంతో, త్యాగ బుద్ధితో, అనాసక్తతతో అనుభవించుచూ ఎవరి ధనాన్ని ఆశించకుండా జీవిస్తే ముక్తి తథ్యం.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment