అమ్మవారికి అమ్మవారే సాటి - చీమలపాటి సూర్యనారాయణ
🙏"శ్రీమాత్రేనమః"🙏
" నిస్తులా " అమ్మవారి అద్భుత నామం. ఇది శ్రీలలితాసహస్రరహస్యనామాలలో 184 వ నామం .
" నిస్తులా " అంటే సాటిలేనిది, ఉపమానము లేనిది అని అర్థం. లోపరహితమయిన ఈ సృష్టిచక్రాన్నంతా ఒంటి చేతితో నడిపిస్తున్నారు అమ్మవారు. అమ్మవారికి సాటి ఎవరయినా ఉన్నారా అనే ఆలోచనే సరికాదు. అమ్మవారు ఏర్పాటుచేసిన భూమి నీరు గాలి లోహాలు తప్ప వేల సంవత్సరాలు అయినా క్రొత్తదేమీ కనిపెట్టలేకపోతున్నారు.
వేదంలో " న తస్య ప్రతిమా అస్తి ( యజుర్వేదం 32:3 )" అని ఉంది. ప్రతిమ అంటే విగ్రహం అనుకుని వేదాలలోనే దేముడికి విగ్రహం లేదు అని ఉంది, విగ్రహారాధన ఏమిటి అని కొందరు వితండవాదం చేస్తున్నారు. ఇక్కడ ప్రతిమ అంటే విగ్రహం అని కాదు, సాటి - ఉపమానం లేదు అని.
అర్జునుడు పరమాత్మ విశ్వరూపం చూసి ఇలా ప్రార్థిస్తాడు:
" పితాసి లోకస్య చరాచరస్య
త్వమస్య పూజ్యశ్చ
గురుర్గరీయాన్,
న త్వత్సమోఽస్త్యభ్యధికః
కుతోఽన్యోలోకత్రయేఽప్య
ప్రతిమప్రభావ "
- భ.గీత 11:43
" నీవే సమస్త విశ్వమునకు, చరాచర ప్రాణులన్నిటికీ తండ్రివి. నీవే సర్వశ్రేష్ఠమైన ఆరాధ్య యోగ్యుడవు మరియు సర్వోత్కృష్ట ఆధ్యాత్మిక గురుడవు. ఓ అసమానమైన శక్తి కలిగినవాడా, ముల్లోకాలలో నీకు సమానులే లేనప్పుడు, నిన్ను మించిన వారు మాత్రం ఎవరుంటారు? " అని.
" ఏకమేవ అద్వితీయం బ్రహ్మ " - సృష్టిలో బ్రహ్మ తప్ప అన్యమేదీ లేదు, " సర్వం ఈశావాస్యం " - సృష్టి అంతా ఒకే చైతన్యంతో నిండి ఉంది అని తెలియచేస్తున్నాయి ఉపనిషత్తులు.
అమ్మవారికి అమ్మవారే సాటి.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment