అమ్మవారు అనవసర బంధాలను తగ్గిస్తారు - చీమలపాటి సూర్యనారాయణ
🙏"శ్రీమాత్రేనమః"🙏
" భవనాశినీ " అమ్మవారి అద్భుత నామం. ఇది శ్రీలలితాసహస్రరహస్యనామాలలో 175 వ నామం.
" భవనాశినీ " అంటే సంసార(బంధ)మును నశింపచేయునది అని అర్ధం. నశింపచేయడం అంటే ఎవరినో ఒకరిని చంపేయడం కాదు, బంధాన్ని తగ్గిస్తుంది అని.
అసలు తగ్గించడం దేనికి?.
కపిలమహర్షి తన తల్లికి తత్వం భోదిస్తూ ఇలా తెలియచేసారు:
" ఏవం స్వభరణాకల్పం
తత్ కళత్రా యస్తధా
నాత్రియంతే యధా పూర్వం
హీనా సాయివ గోజరం "
గోజరం అంటే ముసలి ఎద్దు. " ఎవరి ఆనందంకోసం అయితే జీవితమంతా ఏదోరకంగా ( అధర్మంగా నైనా ) సంపాదిస్తావో ఆ భార్యాపిల్లలు ముసలితనంలో నిన్ను సంపాదించినప్పుడు చూసినట్లుగా చూడరు. వ్యవసాయదారుడు ముసలి ఎద్దును ప్రక్కన పెట్టినట్లుగా నిన్ను మూలన పడేస్తారు భార్యాపిల్లలు " అన్నారు.
భార్యాపిల్లల అవసరాలు తీర్చడం భర్త బాధ్యతే. కాని బంధం పెరిగే కొలదీ వారి ఆనందంకోసం పాపకర్మలు/అధర్మసంపాదన ఎక్కువ అవుతాయి. పాపహేతువు. అమ్మవారితో బంధం పెంచుకుంటే ప్రాపంచికబంధాన్ని తగ్గిస్తుంది. అప్పుడు మనస్సు ప్రశాంతంగా, జీవితం ధర్మబద్ధంగా ఉంటుంది.
" జరామరణమోక్షాయ
మామాశ్రిత్య యతంతి యే,
తే బ్రహ్మ తద్విదుః కృత్స్నం
అధ్యాత్మం కర్మ చాఖిలం "
- భ.గీత 7:29
" నన్ను శరణుపొంది జరామరణవిముక్తికై ప్రయత్నించు పురుషులు
ఆ పరబ్రహ్మను, సమస్త ఆధ్యాత్మమును, సంపూర్ణ కర్మను తెలిసికొందురు " అన్నారు పరమాత్మ గీతలో.
ప్రాపంచికబంధాలు తగ్గేలా అనుగ్రహించమని " భవనాశిని " అమ్మవారిని వేడుకుందాం.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment