పాపపు భవంతులకు పునాది అయిన లోభాన్ని పోగొడుతారు అమ్మవారు - చీమలపాటి సూర్యనారాయణ
🙏"శ్రీమాత్రేనమః"🙏
" లోభనాశినీ " అమ్మవారి అద్భుత నామం. ఇది శ్రీలలితాసహస్రరహస్యనామాలలో 171 వ నామం.
" లోభనాశినీ " అంటే లోభమును పోగొట్టునది. ఎవరిది?. భక్తులది, తనను నమ్ముకున్నవారిది.
" త్రివిధం నరకస్యేదం
ద్వారం నాశనమాత్మనః,
కామక్రోధః తధా లోభః
తస్మాత్ యేతత్ త్రయం త్యజేత్ "
- భ.గీత 16:21
" కామక్రోధలోభాలు నరకద్వారాలు - కనుక వాటిని వదిలేయాలి " అని తెలియచేసారు పరమాత్మ గీతలో. ఈ దుర్గుణాలు అన్నీ నరకానికి తీసుకుని పోయేవే. జాగ్రత్తగా ఉండాలి.
వ్యాసర్షి మహాభారతంలో అసలు మనుషుల పాపాలకి ( కష్టాలకి ) మూలం " లోభము " అన్నారు:
" పాపశ్చతు యదధిష్టానం
తత్ శృణుష్వ నరాధిపా,
ఏకో లోభో మహాగ్రాహో
లోభాత్ పాపం ప్రవర్తతే ".
లోభం అంటే కావాలనుకోవడం. అది అక్కడితో ఆగదు - తనకే కావాలనుకోవడం, ఇంకెవరికీ ఉండకూడదు, ద్రక్కకూడదు అనుకోవడం, అసూయ, కోపం, హింస అన్నీ ఒకటి తరువాత ఒకటి కలుస్తూంటాయి. అంటే పాపపు భవంతులకు " పునాది " లోభం అన్నారు.
అమ్మవారి పాదాలను ఆశ్రయిస్తే అన్ని కష్టాలు/పాపాలకు మూలమైన లోభాన్ని నశింపచేస్తారు. అంతకన్నా కావలసినది ఏముంటుంది.
అమ్మవారి పాదాలను ఆశ్రయించి లోభం మాయలో పడిపోకుండా అనుగ్రహించమని వేడుకుందాం.
ఏతత్ సర్వం శ్రీపరదేవతార్పణమస్తు - సూర్య.
శుభం భూయాత్
Comments
Post a Comment